Bonvenon!

Komputeko (mallongigo de "Prikomputila terminokolekto") estas reta projekto de E@I, kiu celas kunigi la pri-komputilajn terminojn de diversaj vortaroj kaj terminaroj. La ĉefa celo estas plifaciligi la aliron al kaj la komparon inter la diversaj vortaroj, kaj tiel stimuli ĝustan lingvouzon kaj kontraŭi la uzadon de (ofte fuŝa formo de) usonangla termino. La retejo nuntempe estas kvinlingva (Esperanta, angla, nederlanda, germana kaj franca), sed celas plivastiĝi al kiel eble plej multaj lingvoj.

Vi trovos en la Komputeko-retejo tradukojn por pli ol 6630 prikomputilajn terminojn en Esperanto. Regule ni provas plibonigi la retejon, enhave kaj teknike. Jen superrigardo de lastaj novaĵoj:

• 2008-01-29 - Ĝisdatigo de la datumbazo. Ni aldonis 250 kromajn tradukojn kaj korektis kelkajn. Por la UK en Roterdamo ni planas eldoni Komputeko-broŝuron. Ĉu vi volas helpi? Liston de terminoj por kiuj ni ĝis nun ne trovis taŭgan tradukon, vi trovos en la E@I-vikio. Eblas al tiu ĉi paĝo ankaŭ aldoni sugestojn kaj komentojn. Ni estas aŭtomate avertitaj pri aldonoj al tiu ĉi paĝo.
• 2007-12-07 - Ĝisdatigo de la datumbazo. Ni aldonis tradukojn por preskaŭ 400 kromaj terminoj en Esperanto kaj korektis kelkajn.
• 2007-11-21 - Ni aldonis multajn nacilingvajn terminojn (nl: 5000, fr: 3700, de: 3450) kaj anstataŭis la polan lingvon per la germana. Vi povas trovi terminojn en la hispana, kataluna kaj pola lingvoj en la testa varianto de la Komputeko.
• 2007-10-04 - Komputeko estas nun plurlingva kaj vi povas aldoni Komputekon al la serĉbreto de Firefox!

Krom solvi konatajn cimojn kaj aldoni pli da terminoj, ni planas plurlingvigi la interfacon, aldoni lingvojn kaj krei sistemon por ebligi perinterretan redaktadon kaj prijuĝon de la datumbazo. Se vi intertempe trovas eraron aŭ havas proponojn, ne hezitu kontakti nin.

Aperas en la Komputeko nur terminoj de la semantikaj kampoj komputiko kaj interreto. Por terminoj kiuj havas plurajn signifojn ene de tiuj ĉi kampoj (kiel "online") ni provizore aldonis kuntekston inter krampoj al la anglalingva termino.